Aplikimet për edicionin e këtij viti të konkursit RoboTech janë mbyllur me një pjesëmarrje rekord. Mbi 70 grupe nga gjimnazet e ndryshme të Shqipërisë kanë aplikuar për të qenë pjesë e këtij kompeticioni, duke përfshirë më shumë se 250 maturantë të pasionuar pas teknologjisë dhe inovacionit. Ky interes i madh tregon se të rinjtë shqiptarë janë të etur për të eksploruar potencialin e tyre në fushën e robotikës dhe inteligjencës artificiale. Megjithatë, vetëm 30 grupe do të jenë pjesë e këtij edicioni, dhe grupi i profesorëve të Universitetit Metropolitan Tirana po bën përzgjedhjet finale për ekipet pjesëmarrëse, të cilat do të lancohen në ditët në vijim.
Një konkurs me fokus të gjerë
Universiteti Metropolitan Tirana, në bashkëpunim me COD – Center for Openness and Dialogue, Kryeministrinë, Agjencinë Kombëtare të Rinisë dhe MetroResearch, ka prezantuar këtë konkurs të rëndësishëm tek mbi 1500 maturantë në qytete të ndryshme si Tirana, Shkodra, Korça, Elbasani, Fieri, Berati, Vlora, Durrësi dhe Gjirokastra. Në çdo qytet, maturantët janë njohur me mundësitë që ofron ky kompeticion, duke i dhënë atyre një perspektivë të re mbi teknologjinë dhe inovacionin.
Përmes këtij kompeticioni, të rinjtë kanë mundësinë të zhvillojnë aftësitë e tyre teknologjike, kreativitetin dhe zgjidhjen e problemeve praktike, duke i përgatitur ata për sfidat e së ardhmes. Universiteti Metropolitan Tirana synon të krijojë një platformë edukative dhe frymëzuese që nxit një brez të ri inovatorësh, të gatshëm të kontribuojnë në zhvillimin teknologjik të Shqipërisë dhe më gjerë.
RoboTech është një iniciativë e Universitetit Metropolitan Tirana, e cila bashkon teknologjinë dhe inovacionin me sfida reale përmes;
Prezantimit të nxënësve të shkollave të mesme me bazat dhe aplikimet e inteligjencës artificiale dhe robotikës.
Nxitjes së mendimit inovativ që lidh teknologjinë me praktikat e qëndrueshme.
Zhvillimit të aftësive praktike përmes një rrjeti mentorësh dhe ekspertësh.
Krijimit të një ekosistemi bashkëpunimi midis arsimit, industrisë dhe qeverisë.
Konkursi mbulon një gamë të gjerë aplikimesh teknologjike, duke përfshirë projekte mjedisore si menaxhimi i mbetjeve dhe ruajtja e ujit. Nxënësit do të eksplorojnë gjithashtu fusha si bujqësia inteligjente, energjia e rinovueshme, prodhimi i automatizuar dhe kujdesi shëndetësor dixhital. Kjo qasje i ofron maturantëve një perspektivë të gjerë se si teknologjia mund të ndikojë në zhvillimin e ekonomisë shqiptare dhe të sjellë ndryshime pozitive në shoqëri.
Faza e trajnimeve dhe gara për finalen
Nga Shkurti deri në Prill, ekipet do të marrin trajnime dhe mbështetje nga ekspertë të fushës. Ata do të zhvillojnë prototipe duke përdorur teknologjinë e robotikës dhe inteligjencës artificiale për
të adresuar sfidat mjedisore. Ekipet do të kenë akses në burime dhe mjete të nevojshme, ndërsa mentorët dhe pedagogët do t’i udhëzojnë gjatë gjithë procesit. Ky proces do të jetë një përvojë unike mësimore, ku të rinjtë do të përballen me sfida reale dhe do të duhet të gjejnë zgjidhje inovative për to.
Në muajin Prill, ekipet do të paraqesin projektet e tyre të përfunduara në një event kombëtar. Juria do të vlerësojë punën e tyre bazuar në inovacion, ndikimin mjedisor, ekzekutimin teknik dhe bashkëpunimin në grup. Fituesit do të shpallen në kategori të ndryshme si “Inovacioni më i mirë” dhe “Zgjidhja mjedisore më me ndikim”, duke u vlerësuar për kontributin e tyre në avancimin e teknologjisë dhe inovacionit. Përveç shpërblimeve, fituesit do të kenë mundësi të promovojnë idetë e tyre dhe të përfshihen në projekte të mëdha teknologjike në të ardhmen.
Me këtë konkurs, Universiteti Metropolitan Tirana dhe partnerët e tij po vendosin bazat për një të ardhme, ku teknologjia dhe kreativiteti janë në shërbim të zhvillimit të qëndrueshëm dhe progresit shoqëror. Ky është vetëm fillimi i një rrugëtimi që do të inkurajojë të rinjtë të jenë krijues, të mendojnë në mënyrë kritike dhe të përdorin teknologjinë për të ndikuar pozitivisht në botën që i rrethon.
Ekipet më të mira do të shpallen fituese dhe do të marrin çmime të rëndësishme në kategori të ndryshme si “Inovacioni më i mirë” dhe “Zgjidhja mjedisore më me ndikim”. Përveç shpërblimeve, fituesit do të kenë mundësi të promovojnë projektet e tyre në nivel kombëtar dhe ndërkombëtar, duke marrë mbështetje për t’i zhvilluar më tej idetë e tyre.
Çmimet Fituese: Çmimi i Parë: 2000€; Çmimi i Dytë: 1500€; Çmimi i Tretë: 1000€, dhe Çmimi i Publikut: 500€
Teknologjia, kreativiteti dhe inovacioni janë tri shtyllat mbi të cilat ndërtohet RoboTech, duke frymëzuar brezin e ardhshëm të inovatorëve që do të formësojnë zhvillimin e Shqipërisë në vitet që vijnë.
