Master i Shkencave në Inxhinieri Informatike

Programi i studimit Master i Shkencave në Inxhinieri Informatike synon të pajisë studentët me njohuri të thella tekniko-shkencore të nivelit universitar, të cilat kërkohen nga fusha të ndryshme të sistemeve të shpërndarjes së informacionit dhe ruajtjes së të dhënave. Programi akademik i Masterit Shkencor në Inxhinieri Informatike është hartuar duke pasur parasysh kërkesat e tregut të punës për ekspertë në këtë fushë.

Të diplomuarit në këtë program studimi në Universitetin Metropolitan Tirana janë në gjendje të kuptojnë dhe të analizojnë funksionimin e sistemeve komplekse, të administrojnë dhe të mirëmbajnë rrjetat kompjuterikë, të menaxhojnë sistemet kompjuterike dhe të jenë në gjendje të ndërtojnë sisteme informatike të sigurta.

Studentët do të kenë aftësitë për të kuptuar dhe për të zgjidhur probleme të ndryshme tekniko-shkencore nga fushat e sipërpërmendura, për të analizuar çështjet teknologjike dhe inxhinierike, të ndikojnë me njohuritë e tyre në ciklin e jetës së një produkti, të hartojnë punime shkencore dhe të zhvillojnë projekte të ndryshme në fushën e informatikës. Masteri i Shkencave në Inxhinieri Informatike u lejon studentëve të përfshihen në projekte kërkimore shkencore apo të vazhdojnë studimet doktorale.

 Programi i studimit është një program me rendësi, i krijuar tërësisht përmes hulumtimeve në tregun e punës si vendas dhe të huaj, si dhe krahasimin me programet e universiteteve të huaja. Ky programi është një zgjedhje bindëse për profesionistë të ardhshëm sepse:

• Plani mësimor është i hartuar me kujdes duke u bazuar në programet e universiteteve të rëndësishme kombëtare dhe ndërkombëtare, duke u siguruar që programi pasqyron zhvillimet më të fundit të shkencës, përparimet teknologjike dhe standardet akademike në fushën e teknologjisë dhe me një drejtim specifik në projektimin, implementimin, testimin dhe mirëmbajtjen e arkitekturave komplekse si dhe garantimin e sigurisë së informacionit në sistemet on-line.
• Janë të futura praktikat më të mira nga institucione të njohura për të krijuar një qasje mësimdhënëse të qëndrueshme, gjithëpërfshirëse me në qendër studentin. Ky program përfshin një gërshetim të njohurive kryesore, teknikave të avancuara dhe aplikimeve praktike përmes dhënies së shërbimeve të reja, apo përmirësimin e shërbimeve ekzistuese më bazë operimin digjital, të përshtatura tamam, për të përmbushur kërkesat dinamike të tregut të sotëm.
• Stafi akademik pranë Fakultetit të Shkencave Kompjuterike dhe IT sjell një larmishmëri të përvojës akademike dhe tregut të punës, duke siguruar që studentët të marrin njohuri të avancuara dhe praktike. Stafi akademik është i angazhuar në kërkime shkencore dhe bashkëpunime me tregun e punës, duke e fokusuar programin dy drejtime kryesore: në industri, pra në automatizimin e proceseve të punës me anë të kontrollit digjital dhe në shërbime me drejtim tek procesimi i të dhënave.
• Përtej aftësive teknike, programi trajton kompetenca të tërthorta dhe afatgjata si të menduarit kritik dhe kijues, zgjidhjen e problemeve dhe qasje të tilla si komunikimi, dëgjimi dhe empatia. Studentët e diplomuar janë të pajisur jo vetëm me përvoja teknike, por edhe me aftësi për të nxitur vendimmarrjen në qasje organizuese.
• Ka një përkushtim ndaj përmirësimit të vazhdueshëm dhe përditësimit të kurrikulës, bazuar në reagimet e tregut të punës, alumni dhe zhvillimet e kërkimit shkencor brenda dhe jashtë vendit. Kjo siguron që të diplomuarit të marrin njohuri të përgjithshme mbi pjesën hardware, pra, arkitekturat e kompjuterëve dhe ndërthurjen e njësive të ndryshme për ekzekutimin e sistemeve komplekse duke përmbushur nevojat për procesim dhe shkëmbim të sigurt të dhënash. Gjithashtu mësohet nga një gjuhë për çdo familje programimi.

Studentët e diplomuar me Master Shkencor në Inxhinieri Informatike janë shumë të kërkuar në industrinë e teknologjisë që po evoluon me shpejtësi. Me ekspertizën e tyre të avancuar teknike dhe aftësitë e zgjidhjes së problemeve, ata janë në pozitën e duhur për të ndjekur një gamë të gjerë të mundësive për ngjitjen e karrierës.

Të diplomuarit e Inxhinierisë së Informatikës kanë në fokus kryesorë administrimin e rrjeteve, sigurisë kibernetike dhe analiza e sistemeve. Aftësia e tyre për të lundruar në sisteme teknologjike komplekse dhe për të trajtuar sfidat e ndërlikuara i bën ata të vlefshëm në mirëmbajtjen dhe sigurimin e infrastrukturës organizative.

Një tjetër mundësi është roli i inxhinierit të softuerit, ku ata mund të kontribuojnë në projektimin, zhvillimin dhe zbatimin e aplikacioneve dhe sistemeve të softuerit me të fundit. Njohuritë e tyre të specializuara në fusha të tilla si inteligjenca artificiale, machine learning dhe analitika e të dhënave i bën ata të vlefshëm në pozita të shkencës së të dhënave dhe inteligjencës së biznesit, ku ata mund të shfrytëzojnë aftësitë e tyre për të nxjerrë përfundime domethënëse dhe të orientojnë vendimmarrjen.

Përveç këtyre, shumë të diplomuar zgjedhin role drejtuese, si menaxher i projekteve të TI-së ose roli i drejtuesit te përgjithshëm të teknologjisë, ku ata mund të shfrytëzojnë aftësitë e tyre teknike dhe mendimin strategjik për të udhëhequr drejtimin teknologjik të organizatave të tyre. Me një gamë të gjerë të aftësive dhe aftësinë për t’u përshtatur me kërkesat e industrisë që evoluojnë, te diplomuarit e Inxhinierisë së Informatikës janë të favorizuar për të qenë të suksesshëm në një larmi të gjerë mundësish të karrierës se tyre.